Monday, 23 December, 2024
ސިޔާސީ މައިދާނުގައި އިދިކޮޅު ސިޔާސީ ފަރާތްތަކަށް ނިސްބަތްކޮށް، އެކިއެކި ތަންތާނގައި، ތަފާތު ވަނަންތަށް ކިޔާ ކަމަށާއި، އެގޮތަށް ކިޔާ ވަނަންތައް ހަޖަމް ނުކުރެވުމަކީ، ޑިމޮކްރަސީގައި ފަހަތަށް އެޅޭ ފިޔަވަޅެއް ކަމަށް، ރައްޔިތުންގެ މަޖިލީހުގެ ރައީސް، އަދި ކުރީގެ ރައީސުލްޖުމްހޫރިއްޔާ މުޙައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވެފައި ވަނީ، މިވަގުތު އިދިކޮޅު ޚަބަރުތައް ގެނެސްދޭ މަދު ޗެނަލްތަކުގެ ތެރޭގައި ހިމެނޭ “ޗެނަލް13″އިން ގެނެސްދިން ސިޔާސީ ލަވަތަކެއްގައި އަދުގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް ނިސްބަތްކޮށް “ޗޯރުއިބުރޭ” ބޭނުންކޮށްފައިވާތީ އެ ޗެނަލާ ދެކޮޅަށް ފިޔަވަޅުއެޅުމަށް ބްރޯޑްކޮމްއިން ނިންމުމުން އެކަމާ ގުޅިގެން މަޖިލީހުގައި މެންބަރު ފާޅުކުރެއްވި ހިޔާލުފުޅުތަކާ ގުޅުވައި ދެއްކެވި ވާހަކަފުޅެއްގައެވެ.
ރައްޔިތުންގެ މަޖިލީހުގައި ވާހަކަފުޅު ދައްކަވަމުން، ރައީސް ނަޝީދު ވިދާޅުވީ، ކުރީގެ ރައީސުންނަށް ނިސްބަތްކޮށް ތަފާތު ވަނަންތައް ކިޔާފައިވާ ކަމަށެވެ. އަދި އެކަން ހަޖަމްކުރުމަކީ ޑިމޮކްރަސީގެ ސިފައެއްކަމަށް އެމަނިކުފާނު ހަނދާންކޮށްދެއްވިއެވެ.
“އަޅުގަނޑުވެސް ހަނދާންކޮށްދޭނަން އިއްޒަތްތެރި މެންބަރުންނަށް، ކުރީގެ ރައީސް ނާސިރަށް ކަރުކުރު ބައިސާ، ކުރީގެ ރައީސް މައުމޫނަށް ގޮޅާބޯ، ކުރީގެ ރައީސް ނަޝީދަށް ގަންޖާބޯ، ކުރީގެ ރައީސް ވަހީދަށް ބާޣީ ވަހީދު، ކުރީގެ ރައީސް ޔާމީނަށް ރާގޮނޑި ރާޖާ. މިނަންތައް އަޅުގަނޑުމެންވަނީ މި މަޖިލީހާއި އެކިތަންތަނުގައި އެކި ގޮތްގޮތަށް ކިޔާފައި. މިއަދު ޗޯރު އިބުރޭ ކީމައި އެކަމާ އަޅުގަނޑުމެން ހަމައިން ނައްޓައިގެންދާ މިންވަރަށް ކަންބޮޑުވުން އިތުރުކޮށްފިނަމަ، އެއީ އަޅުގަނޑު ދަންނަވާނީ ޑިމޮކްރަސީގެ ރޫހުގައި ފަހަތަށް އެޅޭ ފިޔަވަޅެކޭ،” .
މަޖިލީހުގެ ރައީސް މުޙައްމަދު ނަޝީދު